सर्लाही – सर्लाहीको साेहरवामा दान गरिएकाे जग्गामा बनेकाे विद्यालयकाे भवन आज मङ्गलवार उद्घाटन भएकाे छ । साेहरवका जगरनाथ साहले गोडैता नगरपालिका–४ सोहवामा रहेको जगरनाथ राजकुमारी प्राथमिक विद्यालय रोहवालाई ८४ लाख रुपैयाँ बराबरको जग्गा दान गर्नुभएकाे थियाे । 

साहले गोडैता नगरपालिका–४ रोहुवामा आफ्नो नाममा रहेको आठ कट्ठा १० धुर जग्गाको जग्गाधनी पुर्जा विद्यालयका प्रधानाध्यापक श्रीकृष्ण यादवलाई हस्तान्तरण गर्नुभयो । नयाँ विद्यालय भवन बनाउनका लागि विद्यालयले जग्गादाताको खोजी गरेपछि साहले गएकाे कात्तिक महिनामा जग्गा प्रदान गर्नुभएको थियो । उहाँले विद्यालयलाई जग्गा दान गरेपछि अहिले त्यस जग्गामा सरकारको ६० लाख रुपैयाँको अनुदानमा चारकोठे पक्की भवन बनेकाे हाे । 

विद्यालयलाई जग्गा दान गरेर सहयोग गरेको भन्दै साह र उहाँकी पत्नी राजकुमारीलाई विद्यालयले फूलमाला र दोसल्ला ओढाएर सम्मान गरिएको प्रधानाध्यापक यादवले जानकारी दिनुभयो ।