बाँके – नेपालगञ्ज उपमहानगरपालिका वडा नम्बर १२ मा शिलालेखको विषयमा विवाद उत्पन्न भएको छ । निवर्तमान वडाध्यक्ष बुद्धिसागर सुवेदीले आफ्नो कार्यकालको कामको शिलालेख राख्न खोज्दा बिहीवार तनाव उत्पन्न भएको हो ।

निवर्तमान वडाध्यक्ष सुवेदीको नेतृत्वमा आएको एक समूहले वडा कार्यालयको भित्तामा जबर्जस्ती तोडफोड गर्दै शिलालेख राख्न लागेपछि मात्रै आफूहरूलाई जानकारी भएको वडाध्यक्ष तरुण बज्राचार्यले जानकारी दिनुभयो ।

निवर्तमान वडाध्यक्ष सुवेदीले नागरिककाे सहयोगबाट वडा कार्यालयले ट्र्याक्टर खरिद गरेको जानकारी दिँदै सहयोगीदाता र उपभोक्ता समिति तथा वडा समितिको नाम भएको शिलालेख राख्न नदिनु दुःखद भएको प्रतिक्रिया दिनुभयो । उहाँले विगतमा शिलालेख राख्न समय अभाव भएपछि वर्तमान वडा नेतृत्वलाई शिलालेख राख्न सहयोग गरिदिन लिखित अनुरोध गरे पनि सुनुवाइ नभएपछि स्थानीयहरू आफैँ शिलालेख राख्न बाध्य भएर आएको दाबी गर्नुभयो ।

शिलालेखको विषयमा सहमति नभएपछि तयार पारिएका तीन वटै शिलालेख जिल्ला प्रहरी कार्यालय बाँकेको संरक्षणमा राखिएको छ ।