डोटी - डोटीको सिलगढीमा द्वन्द्वपीडितका कथामा आधारित फोटो प्रदर्शनी कार्यक्रम आयोजना गरिएको छ ।

शैलेश्वरी मन्दिर प्राङ्गणमा अपाङ्गता भएका द्वन्द्वपीडितको राष्ट्रिय सञ्जालको आयोजनामा फोटो प्रदर्शनी कार्यक्रमको आयोजना गरिएको हो । फोटो प्रदर्शनीमा युद्धका जीवित स्मृतिहरू लेखिएका १४ जनाका कथाहरु रहेकाे आयोजकले जनाएको छ।

विगतका समयमा भएका घटनाहरुबाट पाठ सिकेर आउँदाे दिनमा त्यस्ता घटना दोहोरिन नदिन तथा दश वर्षे द्वन्द्वका बेला भएका घटना र द्वन्द्वको असर के थियो भन्ने कुरा नयाँ पुस्तालाई जानकारी दिनु फोटो प्रदर्शनी कार्यक्रमको उद्देश्य रहेको अपाङ्गता भएका द्वन्द्वपीडितको राष्ट्रिय सञ्जालका अध्यक्ष सुरेन्द्र खत्रीले जानकारी दिनुभयो। 

दश वर्षे द्वन्द्वका बेला आफू जस्ता कयौँ नागरिकले भोगेका कुराहरुलाई बाहिर ल्याउँदा न्यायको खोजीमा हिँडिरहेका द्वन्द्वपीडितहरुलाई साहस मिल्ने उहाँको भनाइ छ । 

कर्णाली प्रदेशको सुर्खेतबाट सुरु भएको फोटो प्रदर्शनी कार्यक्रम डोटीमा पनि आयोजना गरिएको हो । सुर्खेत, कालीकोट, अछाम हुँदै डोटीको पुगेको पहिलो चरणको फोटो प्रदर्शनी यात्रा डडेलधुरा, कञ्चनपुर हुँदै कैलालीको धनगढी पुगेर अन्त्य हुने अध्यक्ष खत्रीले बताउनुभयो।