रुकुम पूर्वका मतदाताले फिर्ता मागे चुनावमा दिएको भोट !

माघ २२, २०७५ मंगलबार १५:२५:१८ | राजु लामिछाने

रुकुम पूर्व –आफैले जिताएका सांसदहरुविरुद्ध मतदाता विरलै सडकमा आउँछन् । विरोधका लागि उनीहरुले नाराजुलुस, सभा, बन्द हड्तालजस्ता कार्य पनि कमै मात्रामा गर्दछन् ।

तर रुकुम पूर्वका केही मतदाता भने आफूले दिएको मत फिर्ताको माग गर्दै आन्दोलनमा उत्रिएका छन् ।

जिल्ला सदरमुकाम विवादले तनावग्रस्त रुकुम पूर्वको गोलखाडा सदरमुकामका पक्षधरहरु गएको चुनावमा दिएको मत फिर्ताको माग गर्दै हस्ताक्षर संकलन कार्यमा जुटेका छन् ।

पुथाउत्तरगंगाका १४ वडा र भूमेका तीन वडाका नागरिकले गोलखाडा सदरमुकामको पक्षमा मत जाहेर गर्दा पनि संघीय तथा प्रदेश सांसदहरु केही नबोलेको भन्दै मत फिर्ताको मागसहित हस्ताक्षर अभियान थालिएको स्थानीय अगुवा पुणीराज घर्तीले जानकारी दिनुभयो । सेतो कपडामा मतदाताको हस्ताक्षर संकलन गरेर प्रतिनिधिसभाको संसद सचिवालय र प्रदेश सभाको सचिवालयमा पेश गरिने उनीहरुको भनाइ छ ।

संघीय सांसद कमला रोका तथा यो क्षेत्रमा प्रदेश सांसद तेजबहादुर ओली ‘प्रतीक’ हुनुहुन्छ । सांसदहरुले भने आफूहरुले मुद्दा अदालतमा विचाराधीन रहेकाले अहिले केही गर्न सक्ने अवस्था नरहेको भन्दै संयमित बन्न आन्दोलनकारीलाई अनुरोध गरेका छन् ।

यसअघि नै कांग्रेस सरकारले सरमुकामबारे विवादित निर्णय गरेपछि समस्या आएको र सहमतिका लागि निरन्तर लागिरहेको उनीहरुको प्रतिक्रिया रहेको छ ।

रुकुमकोटमा रहेको जिल्ला सदरमुकाम तत्कालीन शेरबहादुर देउवा नेतृत्वको सरकारले २०७४ माघ ११ गते पुथा उत्तरगङ्गा गाउँपालिका–१२, गोलखाडामा राख्ने निर्णय गरेको थियो । देउवा नेतृत्व सरकारको त्यस निर्णयविरुद्ध २०७४ माघ १७ मा सर्वोच्चमा रिट दर्ता भएको थियो । उक्त रिटको सुनुवाइ गर्दै सर्वोच्चले तत्काल सदरमुकाम नसार्न अन्तरिम आदेश दिएको थियो ।

रिट दर्ता भएको एक वर्षसम्ममा पनि सर्वोच्च सरकार र रिट निवेदकलाइ पटकपटक पेशी र साधारण तरिकाले बोलाए पनि अहिलेसम्म कुनै फैसला भएको छैन ।
सदरमुकाम विवादको विषयमा छलफल गर्न दुवै पक्षलाई सर्वोच्चले आउँदो माघ २७ गते बोलाएको छ ।

माघ २७ गते नै अन्तिम फैसला हुने आशंकाका बीच रुकुमकोट र गोलखाडा पक्षधरहरुले विभिन्न दबाबमूलक कार्यक्रम गर्दै आएका छन् ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राजु लामिछाने

राजु लामिछाने रुकुमका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्