दुई महिनामै साढे २२ लाखको दूध निर्यात भएपछि किसान खुशी

चैत १३, २०७५ बुधबार १६:१०:५७ | राजु लामिछाने

रुकुम पश्चिम – जिल्लामा सञ्चालित नागरिक दुग्ध सहकारी संस्थाले दुई महिनामै साढे २२ लाखको दूध जिल्लाबाहिर निर्यात गरेको छ । गएको माघमा सञ्चालनमा आएको सहकारी संस्थाले दूध बिक्रीबाट २२ लाख ५५ हजार रुपैयाँको कारोबार गरेको हो ।

नागरिक दुग्ध सहकारीका अनुसार, ३-३ दिनको फरकमा जिल्लाका विभिन्न स्थानबाट संकलन गरिएको दूध नेपालगञ्ज पठाइन्छ । सहकारीका अध्यक्ष धिरन सिर्पालीले दुई महिनाको अवधिमा यहाँबाट साढे २९ हजार लिटर दूध नेपालगञ्ज पठाइएको बताउनुभयो । जिल्लाका विभिन्न १४ स्थानमा संकलन केन्द्र स्थापना गरेर किसानले उत्पादन गरेको दूध बिक्री वितरण गर्ने गरेको अध्यक्ष सिर्पालीको भनाइ छ । माघ र फागुन महिनामा सहकारीले झण्डै ४१ हजार लिटर दूध संकलन गरेको भए पनि जिल्लामा खपत भएर बचेको २९ हजार २ सय लिटर जिल्लाबाहिर निर्यात गरेको उहाँले बताउनुभयो ।

गाउँमा किसानले उत्पादन गरेको दूध नियमित रुपमा बिक्री हुन थालेपछि किसानहरु पनि खुशी भएका छन् । दूध बेच्नको लागि कुनै समस्या नभएको सानीभेरी गाउँपालिका ११ का रामबहादुर खड्काले बताउनुभयो । पहिले गाउँमा दूध उत्पादन हुने भए पनि बजारको समस्याका कारण बिक्री नहुने गरेको समस्या अहिले नरहेको उहाँको भनाइ छ । किसानले उत्पादन गरेको दूधलाई सहकारीले प्रतिलिटर ४२ रुपैयाँमा खरिद गर्दै आएको छ । किसानले हरेक महिनाको अन्तिममा दूधको मूल्य पाउने गरेका छन् ।

सहकारीले यहाँको दूधलाई सहज रुपमा जिल्लाबाहिर निर्यात गर्नको लागि र गाउँगाउँबाट सहकारीमा दूध जम्मा गर्नको लागि तीनवटा गाडीको व्यवस्था गरेको छ । दुई वटा गाडीले गाउँमा उत्पादन गरेको दूधलाई संकलन गर्ने र एउटा चिलिङ् भ्यानले नेपालगन्जमा लैजाने गरेको सहकारीका अध्यक्ष सिर्पालीको भनाइ छ ।

गाउँमा स्थापना भएका संकलन केन्द्रमा हरेक दिन किसाले दूध ल्याउने र त्यहाँबाट सहकारीको गाडीले सहकारीमा जम्मा गर्दै आएको छ । दैनिक ३ सय ३० जना किसानले उत्पादन गरेको दूध सहकारीमा जम्मा हुने गरेको सहकारीले जनाएको छ । त्रिवेणी गाउँपालिकाबाट ६ सय लिटर, सानीभेरी गाउँपालिकाबाट ४ सय ५० लिटर र मुसिकोट नगरपालिकाबाट २ सय लिटर गरेर दैनिक एक हजार २ सय ५० लिटर दूध संकलन हुँदै आएको सहकारीको तथ्याङ्क रहेको छ ।

१ करोड ३० लाख लगानीमा दुग्ध सहकारी स्थापना गरिएको सहकारीका सचिव छविलाल केसीले बताउनुभयो । सहकारीमा कर्णालीप्रदेश भुमि व्यवस्था तथा कृषि सहकारी मन्त्रालयको ७९ लाख आर्थिक सहयोग छ भने अन्य सबै लगानी शेयर सदस्यको रहेको छ । सचिव केसीका अनुसार, जिल्लामा पहिलो पटक दुग्ध चिस्यान केन्द्रको स्थापना गरेर यहाँ उत्पादन भएको दूधलाई प्रदेश ५ को नेपालगञ्ज पठाउने गरिएको भएता पनि आगामी दिनमा दाङ, लमहीलगायतका शहरमा पठाउने सहकारीको तयारी छ ।

अहिले जिल्लाबाट एक पटक ४ हजार लिटर दूध जिल्लाबाहिर निर्यात हुने गरेको छ । सहकारीले गत माघ ४ गते जिल्लाका किसानले उत्पादन गरेको दूध पहिलो पटक नेपालगञ्ज पुर्‍याएको थियो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राजु लामिछाने

राजु लामिछाने रुकुमका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्