भक्तपुर - प्रतिनिधिसभाका सांसद एवं पूर्वउद्योग मन्त्री महेश बस्नतेले साेमबार उज्यालो भक्तपुर अभियानको शुभारम्भ गर्नुभएको छ ।

सोमबार राति आठ बजे सूर्यविनायक नगरपालिका-७ को गुण्डु चोकबाट खहरेसम्मको २ किलोमिटर दुरीको मुख्य सडकमा जडान गरिएको ३० वटा सोलार बत्ती एकैपटक बालेर उहाँले अभियानको शुभारम्भ गर्नुभएको हो । अभियानको उद्घाटन गर्दै उहाँले नेपालमा सम्पन्न भएको लगानी सम्मेलनका बेला चिनियाँ कम्पनीसँग आफूले गरेको अनौपचारिक सम्वादले औपचारिक स्वरुप लिँदा भक्तपुरलाई उज्यालो बनाउने अभियानको सुरुवात भएको बताउनुभयो । 

उहाँले भन्नुभयो, ‘विगतमा धेरै वर्षदेखि लोडसेडिङ लगायतका विभिन्न कारणले अँध्यारोमा बस्न बाध्य यहाँका बासिन्दाले लागि अब सधैं तिहारको दिपावली जस्तो उज्यालो ‍पाएका छन्, प्रधानमन्त्री रोजगार कार्यक्रममा एक महिनासम्म लाग्नुभएको युवाहरुले स्वयंसेवी रुपमा बत्ती जडान कार्यमा सहयोग पुर्याएको धन्यवाद भन्न चाहन्छु ।’

भक्तपुरलाई ग्रीन सिटीको रुपमा विकास गर्दै हरियालीयुक्त सहर बनाउने उद्देश्यले कौशलटारबाट सिरुटारसम्मको सडकमा हरियाली सडक अभियान सुरु भएर विरुवा रोपेको बताउँदै उहाँले उज्यालो अभियान र हरियाली अभियान जिल्लाभरी बिस्तार गर्ने भनाइ राख्नुभयो । 

चिनियाँ कम्पनी ग्यान्सू नेचूरल इनर्जी रिसर्च इन्स्टिच्यूटकाे २५ लाख रुपैयाँको लगानीमा सडकमा सौर्य बत्ती जडान गरिएको हाे ।