दाङ : पर्यटकीय तथा धार्मिकस्थलमा 'लकडाउन'को प्रभाव, आम्दानी घटेपछि सञ्चालनमा समस्या

वैशाख २९, २०७७ सोमबार १८:७:१८ | हेमराज शर्मा

दाङ - लकडाउनको प्रभाव दाङका प्रमुख पर्यटकीय तथा धार्मिक स्थलहरुमा देखिएको छ ।

दैनिकरुपमा सयौँ जना घुम्न एवं पूजाआजाका लागि जाने पाण्डवेश्वर धार्मिक धाम, राप्ती शान्ति उद्यान पार्कलगायतका ठाउँमा दैनिक कार्य सञ्चालन गर्न नै धौधौ परेको छ । सरकारले सामूहिक भेला हुन रोक लगाएसँगै यी ठाउँको आम्दानी घटेपछि सञ्चालनमा समस्या परेको हो ।

तुलसीपुर उपमहानगपालिका ६ मा रहेको राप्ती शान्ति उद्यान पार्कको गेट नखुलेकै दुई महिना पुग्न लागिसक्यो । चैत्र महिनाको सुरुवातसँगै सुनसान रहेको यो पार्कले पहिलेकै अवस्थामा फर्किन अझै कति दिन पर्खनु पर्ने हो थाहा छैन ।

दैनिक सयौँ मानिसहरु घुम्न तथा पिकनिकका लागि पुग्दा मासिक कम्तीमा दुई लाख रुपैयाँ आम्दानी हुँदै आएको शान्ति उद्यानको आय दुई महिनादेखि शून्य छ ।

आम्दानी घट्नुको प्रत्यक्ष असर उद्यान सञ्चालनमा मात्र नभइ त्यहाँ रहेका जनावर तथा पशुपंक्षीमा समेत परेको उद्यान व्यवस्थापन समितिका अध्यक्ष डिल्ली भण्डारी बताउनुहुन्छ ।

राप्ती शान्ति उद्यानको जस्तै अवस्था घोराही उपमहानगरपालिका ५ मा रहेको पाण्डवेश्वर धार्मिक धामले पनि भोगिरहेको छ । दर्शनका लागि पालो पर्खेर आफू अगाडि बस्ने दर्शनार्थीहरुको भिड यो मन्दिरले नदेखेको पनि दुई महिना पुग्न लागिसक्यो ।

अहिले यहाँका मन्दिर र मूर्तिहरु नै दर्शनार्थी पर्खेर बसिरहेको भान हुन्छ । कोभिड–१९को प्रभाव विश्वव्यापी भएसँगै मन्दिर व्यवस्थापन समितिले मन्दिर परिसरमा गरिने सार्वजनिक कार्यक्रम रोकेको थियो ।

सरकारले घोषणा गरेको लकडाउनले यहाँ आउने धार्मिक तथा पर्या पर्यटकहरुको सङ्ख्या शून्यमा झर्‍यो । मानिसहरुको आवत जावत घट्दा मन्दिर व्यवस्थापनको आयस्रोत मात्रै नभइ आफूहरुको आयसमेत घटेको पाण्डवेश्वर मन्दिरका पूजारी पदमप्रसाद गौतम बताउनुहुन्छ ।

दाङ उपत्यकाका यी दुई प्रमुख पर्यटकीयस्थलको जस्तै अवस्था जिल्लाका सबै धार्मिक तथा पर्यटकीय स्थलको छ । लमही नगरपालिकाको जखेरा ताल, बबई गाउँपालिकाको पुरन्धारा छहरा, गढवा गाउँपालिकाको जँगलकुटीलगायतका पर्यटकीयस्थल पनि सुनसान छन् ।

प्रमुख पर्यटकीय स्थलमा मानिसहरुको चहलपहल हुन नदिन प्रहरीले निगरानी गर्ने गरेको छ भने सम्बन्धित स्थलका व्यवस्थापन समितिले समेत नआउन भनि सूचना जारी गरेका छन् ।

यी क्षेत्रलाई प्रमुख पर्यटकीय क्षेत्रको रुपमा विकास गर्न प्रदेश सरकारले लगानी गर्दै आएको छ । आफ्नो क्षेत्रमा भएका सम्पदाको प्रचार प्रसार गरी पर्यटक भित्र्याउने स्थानीयको प्रयासमा प्रदेश सरकारले गरेको हातेमालो सार्थक बन्दै गइरहेको बेला कोरोना कहर बाधक बनेको स्थानीयहरुको भनाइ छ ।

लकडाउनकै बीचमा पनि ती ठाउँमा सानातिना निर्माणका काम भने भइरहेका छन् ।

अन्तिम अपडेट: कात्तिक ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्