डाक्टर भट्टराईकाे प्रश्न : विदेशी ज्वाइँ आएर देश खाइदिन्छ भनेर किन डराउनु पर्‍यो ?

 असोज ३, २०७६ शुक्रबार १८:३५:० | उज्यालो सहकर्मी
unn.prixa.net

काठमाण्डाै - पूर्व प्रधानमन्त्री डा. बाबुराम भट्टराईले नागरिकतामा छोरा र छोरीबीच विभेद गर्न नपाइने बताउनु भएको छ ।

समाजवादी पार्टी, नेपालका संघीय परिषद अध्यक्षसमेत रहनु भएका भट्टराईले वैवाहिक अंगीकृत नागरिकता बुहारीलाई तत्काल दिने तर ज्वाइँलाई नदिने नागरिकतासम्बन्धी प्रावधान विभेदपूर्ण भएको भन्दै त्यसलाई हटाउनुपर्ने पार्टीको अडान पनि राख्नुभयो ।

शुक्रबार काठमाण्डौमा आयोजित ‘संविधान संशोधनको अपरिहार्यता र आवश्यक्ता’ विषयक अन्तरक्रिया कार्यक्रममा बोल्दै उहाँले विदेशी ज्वाइँले देश भरिन्छ भनेर डराउनुपर्ने अवस्था नरहेको पनि बताउनुभयो । ‘आफ्नै छोराछोरी विदेशतिर गएर देश खालि हुन लागेको छ,’ भट्टराईको प्रश्न थियो, ‘विदेशी ज्वाइँ आएर देश खाइदिन्छ भनेर किन डराउनु पर्‍यो ?’

संघीय संसदको राज्य व्यवस्था तथा सुशासन समितिमा नागरिकतासम्बन्धी विधेयकमा विवाद छ । पूर्व प्रधानमन्त्री भट्टराईले पनि सरकारले प्रस्ताव गरेको विधेयक त्रुटिपूर्ण भएको उल्लेख गर्दै त्यसमा छोरा र छोरीबीच विभेद हुने गरी आएको प्रावधानलाई हटाउनुपर्ने माग गर्नुभयो ।

भट्टराईले देशलाई समृद्ध बनाउने हो भने जातीय आधारमा पूर्ण समानुपातिक प्रतिनिधित्व हुने गरी व्यवस्थापिका र प्रत्यक्ष कार्यकारी राष्ट्रपति हुने शासकीय व्यवस्था कायम गर्नुपर्ने पनि बताउनुभयो ।

अन्तिम अपडेट: असोज १०, २०७६

तपाईको प्रतिक्रिया