हेटौंडाको तरकारी खेती अवलोकन गर्दै मुख्यमन्त्री पौडेल

 असोज २२, २०७६ बुधबार १८:५१:६ | उज्यालो सहकर्मी
unn.prixa.net

मकवानपुर – हेटौंडा–६ चौघडामा सञ्चालन गरिएको तरकारी खेतीको प्रदेश नम्बर ३ का मुख्यमन्त्री डोरमणी पौडेलले अवलोकन गर्नुभएको छ । प्रदेश ३ सरकारको भूमि, कृषि तथा सहकारी मन्त्रालयको सहयोगमा सुरु गरिएको तरकारी तथा फूल खेतीको मुख्यमन्त्री पौडेलले अवलोकन गर्नु भएको हो ।

हेटौंडा–६ चौघडाका बालकृष्ण चौलागाईंले ग्रीन हाउस निर्माण गरी गर्नुभएको ‘मन्जुश्री आधुनिक फूल एवम् तरकारी खेती’ को उहाँले बुधबार अवलोकन गर्नुभएको हो ।

गोलभेँडा खेतीको अवलोकन गर्दै पौडेलले भन्नुभयो, ‘आधुनिक कृषिको विकास गरी प्रदेश तीनलाई तरकारीमा आत्मनिर्भर बनाउने नै हाम्रो उद्धेश्य हो ।’ उहाँले भन्नुभयो ‘प्रदेश तीन सरकारले कृषिमा आधुनिकीकरण गर्न र कृषि पेशा उद्योगसँग जोड्न कृषिको क्षेत्रमा विकासका योजना ल्याउने तयारी गरिरहेको छ ।’

प्रदेश सरकारले विशिष्टिकृत उत्पादन क्षेत्र निर्धारण गरी सामूहिक करार खेतीमा आधारित एकीकृत कृषि प्रणाली अभियानको रुपमा कार्यान्वयनमा ल्याउने उहाँले बताउनुभयो ।

उहाँले सार्वजनिक तथा निजी क्षेत्रको साझेदारीमा एक जिल्ला एक एकीकृत श्रोत केन्द्रसहितको कृषि फार्म सञ्चालन गर्ने समेत जानकारी दिनुभयो । प्रदेशका ६६ निर्वाचन क्षेत्रमा ६६ नमूना कृषि फार्म सञ्चालन गर्ने मुख्यमन्त्री पौडेलले बताउनुभयो । 

अन्तिम अपडेट: असोज २५, २०७६

तपाईको प्रतिक्रिया