‘कोरोना सङ्क्रमण घटे पनि अझै सावधानी आवश्यक’

जेठ १८, २०७८ मंगलबार ८:५६:३५ | उज्यालो सहकर्मी

पछिल्लो एक हप्तायता कोरोना सङ्क्रमितको सङ्ख्या घट्दै र निको हुनेको सङ्ख्या बढ्दै जान थालेको छ ।

गएको जेठ ११ गतेसम्म आठ हजारको हाराहारीमा सङ्क्रमित देखिने गरेकोमा त्यो सङ्ख्या घटेर अहिले झण्डै चार हजारमा झरेको छ । जेठ पहिलो हप्ता ३९ प्रतिशतमा सङ्क्रमण देखिएकोमा दोस्रो हप्ता घटेर ३७ प्रतिशतमा पुगेको थियो । पछिल्ला तीन दिनको औसत दर ३० प्रतिशत छ । हिजो अझै घटेर २७ दशमलव २२ प्रतिशतमा सङ्क्रमण देखिएको छ ।

कहिले कति सङ्क्रमण ?

जेठ ११ गते २२ हजार नौ सय ३६ जनाको पीसीआर र एन्टिजेन परीक्षण गर्दा आठ हजार ६ सय ३६ जना अर्थात ३७.६५ प्रतिशतमा सङ्क्रमण पुष्टि भएको थियो । त्यसयता हरेक दिन सङ्क्रमितको सङ्ख्या घट्दै गएको स्वास्थ्य तथा जनसङ्ख्या मन्त्रालयको तथ्याङ्कले देखाएको छ ।

जेठ १२ गते १९ हजार तीनसय ५२ जनाको पीसीआर र एन्टिजेन परीक्षण गर्दा ६ हजार ७ सय १४ जना अर्थात ३९.६९ प्रतिशतमा सङ्क्रमण पुष्टि भएको थियो भने जेठ १३ गते २० हजार नौ सय ५२ जनाको पीसीआर र एन्टिजेन परीक्षण गर्दा ६ हजार नौ सय ३९ जना अर्थात ३३.०६ प्रतिशतमा सङ्क्रमण देखिएको थियो । जेठ १४ गते पनि २० हजार एक सय १० जनाको पीसीआर र एन्टिजेन परीक्षण गर्दा ६ हजार ९ सय ५१ जना अर्थात ३४.५६ प्रतिशतमा सङ्क्रमण पुष्टि भएको थियो भने त्यसयता सङ्क्रमितको सङ्ख्या दैनिक दुई हजारको हाराहारीमा घटेको छ ।

गएको जेठ १५ गते १४ हजार ७ सय ५२ जनाको नमुना परीक्षण गर्दा ४ हजार ४ सय ८७ जना अर्थात ३०.४२ प्रतिशतमा सङक्रमण पुष्टि भएको थियो । १६ गते १२ हजार सात सय ७० जनाको एन्टिजेन र पीसीआर परीक्षण गर्दा चार हजार तीन सय ६९ जना अर्थात ३४.२१ प्रतिशतमा सङ्क्रमण देखिएको थियो । हिजो १७ हजार चार सय ८० जनाको एन्टिजेन र पीसीआर परीक्षण गर्दा चार हजार सात सय ६२ जना अर्थात २७.२४ प्रतिशतमा सङ्क्रमण देखिएको हो ।

एक हप्तायता मृत्युदरमा पनि कमी आएको गएको छ । जेठ १० गते एक सय ८५ जनाको सङ्क्रमणका कारण ज्यान गएको थियो भने त्यसयता क्रमशः हरेक दिन सङ्क्रमणबाट मृत्यु हुनेको सङ्ख्या घट्दो छ । जेठ ११ गते एक सय ६९, १२ गते एक सय ४५ जना, १३ गते एक सय ६ जना, १४ गते ९६ जना, १५ गते एक सय १६ जना, १६ गते एक सय ९ जना र हिजो एक सय १४ जनाको सङ्क्रमणबाट ज्यान गएको छ । यसअघि जेठ ५ गते अहिलेसम्मकै धेरै दुई सय ४६ जना सङ्क्रमितको ज्यान गएको थियो । त्यसयता सङ्क्रमणबाट ज्यान गुमाउनेको सङ्ख्या घट्दै गएको छ ।

अझै सचेत रहन आग्रह

सङ्क्रमण घटे पनि ढुक्क हुने अवस्था नरहेको भन्दै विज्ञहरुले अझै सचेत रहन आग्रह गरेका छन् । अहिले सहरको तुलनामा गाउँमा सङ्क्रमण बढ्न थालेको छ । गाउँघरमा स्वास्थ्य मापदण्डको पालना कम भएकाले सङ्क्रमण बढेको भन्दै विशेष ध्यान दिन डाक्टरले सुझाव दिएका छन् ।

सशस्त्र प्रहरी अस्पतालमा कोरोना उपचारमा संलग्न डाक्टर रोशन पराजुलीले घरधन्दा र खेतीपातीको काम गर्दासमेत मास्क लगाउन तथा भौतिक दूरीको ख्याल गर्न आग्रह गर्नुभयो । सङ्क्रमण भएमा गाउँमै पनि सुरक्षित तरिकाले आइसोलेशनमा बस्न सकिने भन्दै उहाँले श्वासप्रश्वासमा समस्या भएमा तत्कालै नजिककै स्वास्थ्य संस्थामा जान आग्रह गर्नुभयो ।

अन्तिम अपडेट: कात्तिक १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्