चितवन – नेकपा माओवादी केन्द्रका अध्यक्ष पुष्पकमल दहाल प्रचण्ड सुटुक्क चितवन आएर काठमाण्डौ फर्कनुभएको छ । अघिपछि प्रचण्ड चितवन आउँदा उहाँको सचिवालयले मात्र होइन जिल्ला तहका नेताले भरतपुर विमानस्थलमा फुलमालाले स्वागत गर्दथे । 

प्रचण्ड आज चितवन आएको कुरा न हल्ला गरियो न विमानस्थलमा स्वागत । भरतपुर महानगरको मेयरमा सत्ता गठबन्धनबाट छोरी रेनु दहालले उम्मेदवारी दर्ता गराएकै भोलिपल्ट आज बिहान प्रचण्ड चितवन आएर केही समय बसेर फर्कनुभएको थियो । 

प्रचण्ड भरतपुरको पछिल्लो अवस्थाका बारेमा चासो राख्दै असन्तुष्ट कांग्रेस नेता तथा कार्यकर्ता फकाउन चितवन आउनुभएकाे हुनसक्ने बताइएको छ । उहाँले नेता र कार्यकर्ता भेटेर फर्कनुभएको हाे । उहाँले भरतपुर महानगरपालिका १० मा रहेको रेनु दाहाल निवासमा कांग्रेस र माओवादी नेताहरूसँग छलफल गर्नुभयाे । 

चितवनमा असन्तुष्ट कांग्रेसका तर्फबाट पूर्वसांसद जगन्नाथ पौडेलले मेयरमा बागी उम्मेदवारी दिएपछि रेनुको भोट घट्ने आँकलन सत्ता गठबन्धनको छ । नेपाली कांग्रेसका तर्फबाट भरतपुर महानगरमा मेयरका बागी उम्मेदवार जगन्नाथ पौडेलले प्रचण्डसँग आज प्रत्यक्ष भेटघाट नभएको बताउनुभएको छ । सत्ता गठबन्धनका नेताहरूसँग कुराकानी भइरहेको तर आफूले उम्मेदवारी फिर्ता नलिने उहाँले बताउनुभएको छ ।