काठमाण्डौ – नेपाल र युरोपेली संघ संयुक्त आयोग बैठक काठमाण्डौमा सुरु भएको छ । हरेक दुई वर्षको अन्तरालमा हुने यो बैठक यो वर्ष काठमाडौमा भएको हो । 

बैठकमा नेपाली प्रतिनिधि मण्डलको प्रतिनिधित्व परराष्ट्र सचिव शङ्करदास वैरागीले गर्नुभएको छ भने युरोपेली संघको तर्फबाट एसियाप्रशान्त क्षेत्र हेर्ने नायब निर्देशक पाओला पम्पालोनीले प्रतिनिधिमण्डलको नेतृत्व गर्नुभएको छ । 

यो बैठकमा मुख्यगरी युरोपेली संघले नेपाललाई उपलब्ध गराउँदै आएको आर्थिक तथा विकास सहायता र संयुक्त लगानीको विषयमा छलफल हुनेछ । यसका साथै युरोपेली संघले विश्वव्यापी रुपमा वकालत गर्दै आएको पर्यावरण संरक्षण सम्बन्धी नेपालमा हुँदै आएको कार्यक्रमको मूल्यांकन पनि गरिनेछ । 

युरोपेली संघले नेपाल सरकारलाई उपलब्ध गराउँदै आएको व्यापार-वाणिज्य, ऊर्जा, विज्ञान तथा प्रविधि, कृषि, मानव संशाधन विकासका क्षेत्रमा सञ्चालित कार्यक्रमको बारेमा पनि छलफल हुने कार्यतालिका छ । नेपाल र युरोपेली संघबीच सन् १९७५ मा कुटनीतिक सम्बन्ध स्थापना भए यता संघले नेपालको आर्थिक एवं सामाजिक विकासको क्षेत्रमा सहयोग गर्दै आएको छ । 

संघले यसका अलावा नेपालको राजनीति र विकसित घटनाहरुमा समेत आफ्नो धारणा सार्वजनिक गर्ने गरेको छ र यो सधैं चर्चा र विवादित बन्ने गरेको छ । 

पारस्परिक लाभका विषयमा सहयोग आदानप्रदान गर्न सन् १९८६ मा युरोपेली संघ संयुक्त आयोगको स्थापना भएको हो । यसको प्रधान कार्यालय ब्रसेल्समा रहेको छ । अर्को दुई वर्षपछि नेपाल सरकार युरोपेली संघ संयुक्त आयोगको बैठक ब्रसेल्समा बस्ने छ ।